RTGS სისტემის მონაწილე შეიძლება იყოს: 

• ეროვნული ბანკის მიერ ლიცენზირებული კომერციული ბანკი, მიკრობანკი და რეგისტრირებული მნიშვნელოვანი საგადახდო მომსახურების პროვაიდერი;
• საქართველოს ფინანსთა სამინისტროს სახაზინო სამსახური;
• საქართველოს ეროვნული ბანკი.

 

RTGS სისტემაში დაშვებულია შემდეგი მონაწილეობის ტიპები:
პირდაპირი მონაწილე - მონაწილე, რომელსაც აქვს საგადახდო სისტემასთან პირდაპირი ტექნიკური ინტეგრაცია და სისტემაში საგადახდო შეტყობინებებს აგზავნის და იღებს შუამავლის გარეშე. ამ ტიპის მონაწილეს  აქვს საკუთარი ანგარიშსწორების ანგარიში.

არაპირდაპირი მონაწილე ტიპი 1 - იურიდიული პირი, რომელიც სისტემაში ტექნიკურად არ არის დაშვებული, მაგრამ აღირიცხება სისტემაში ამ ტიპის მონაწილეთა რეესტრში. არაპირდაპირი მონაწილე ტიპი 1 სისტემაში გადახდებს ახორციელებს და ჩარიცხვებს იღებს პირდაპირი მონაწილის ან/და არაპირდაპირი მონაწილე ტიპი 2-ის მეშვეობით.

არაპირდაპირი მონაწილე ტიპი 2 -  მონაწილე, რომელსაც აქვს საგადახდო სისტემასთან პირდაპირი ტექნიკური ინტეგრაცია და სისტემაში  საგადახდო შეტყობინებებს აგზავნის და იღებს შუამავლის გარეშე. ამ ტიპის მონაწილეს არ აქვს საკუთარი ანგარიშსწორების ანგარიში. მისი ოპერაციების ანგარიშსწორება ხორციელდება სხვა პირდაპირი მონაწილის ანგარიშსწორების ანგარიშის საშუალებით. 

 

თუ პრეტენდენტს სურს RTGS სისტემაში ჩართვა პირდაპირი მონაწილის ან არაპირდაპირი მონაწილე ტიპი 2 სტატუსით, ის ეროვნული ბანკის მიერ დაშვებული იქნება სისტემაში მონაწილეობისთვის მხოლოდ იმ შემთხვევაში, თუ დააკმაყოფილებს საქართველოს ეროვნული ბანკის პრეზიდენტის 2026 წლის 24 აპრილის №96/04 ბრძანებით დამტკიცებული „საქართველოს ეროვნული ბანკის საგადახდო სისტემაში ჩართვის წესს“ და RTGS სისტემის წესებით განსაზღვრულ ყველა მოთხოვნას და ვალდებულებას.

1. პრეტენდენტი სისტემაში ჩართვისთვის წერილობით მიმართავს ეროვნულ ბანკს და წარმოადგენს 2026 წლის 24 აპრილის №96/04 ბრძანებით გათვალისწინებულ კრიტერიუმებთან შესაბამისობის დამადასტურებელ დოკუმენტებს. და სხვა დამატებით ინფორმაციას საჭიროების შემთხვევაში.
2. ეროვნული ბანკი განიხილავს განაცხადს და მიღებულ გადაწყვეტილებას აცნობებს პრეტენდენტს ბრძანებით გაწერილი ვადების შესაბამისად.
3. დადებითი გადაწყვეტილების მიღების შემთხვევაში საგადახდო სისტემაში ჩართვის პროცესი წარიმართება ეროვნული ბანკის მიერ დადგენილი წესების შესაბამისად.
4. საგადახდო სისტემაში ჩასართავად:
    
   • სისტემის მონაწილეს უნდა ჰქონდეს საბანკო კოდი, რომლის საშუალებითაც სისტემა დადგენილი წესების შესაბამისად განახორციელებს მის იდენტიფიკაციას;
   • სისტემის მონაწილეს უნდა ჰქონდეს გახსნილი საკორესპონდენტო/ ანგარიშსწორების ანგარიში საქართველოს ეროვნულ ბანკში;
   • სისტემის მონაწილე ვალდებულია გამართოს ეროვნული ბანკის მიერ მისთვის მიწოდებული სისტემის პროგრამული უზრუნველყოფა, მისი მხარდამჭერი ყველა კომპონენტი, მათ შორის საგადახდო შეტყობინებებზე ციფრული ხელმოწერის საშუალებები და უზრუნველყოს RTGS სისტემასა და შიდა სისტემას შორის ინფორმაციის უწყვეტ რეჟიმში გაცვლა;
     
     
5. სისტემის ოპერატორი უზრუნველყოფს სატესტო გარემოში ტესტირების მიზნით პრეტენდენტის მხარდაჭერას და შეთანხმებული გეგმის მიხედვით ტრენინგის ჩატარებას.
6. პრეტენდენტის ტესტირების წარმატებით დასრულების და RTGS სისტემის წესებით განსაზღვრული მონაწილეობის კრიტერიუმების დაკმაყოფილების შემთხვევაში, სისტემის ოპერატორსა და მონაწილეს შორის  ფორმდება „დროის რეალურ რეჟიმში ანგარიშსწორების (RTGS) სისტემაში  მონაწილეობის შესახებ ხელშეკრულება.