ყველაზე წარმატებული ინფრასტრუქტურული გადაწყვეტილების ნომინაციაში საქართველოს ეროვნული ბანკი წელსაც ლიდერია

საქართველოს ეროვნულმა ბანკმა, კიბერუსაფრთხოებისა და ინფორმაციული ტექნოლოგიების განვითარების რეგიონულ კონფერენციაზე - GITI 2015, „ყველაზე წარმატებული ინფრასტრუქტურული გადაწყვეტილების“ ნომინაციაში წელსაც გაიმარჯვა და უკვე მესამედ ლიდერის პოზიციას იკავებს.

„ყველაზე წარმატებული ინფრასტრუქტურული გადაწყვეტილება", პროექტის ფარგლებში განხილულ იყო საქართველოს ეროვნულ ბანკში უკანასკნელ პერიოდში ინფორმაციული უსაფრთხოების ის ტექნოლოგიური გადაწყვეტილებები, რომელიც საქართველოს ეროვნულ ბანკში ISO 27001 სერტიფიცირების ფარგლებში დაინერგა. გასულ წელს კი ქვეყანაში პირველად საქართველოს ეროვნული ბანკი ინფორმაციული უსაფრთხოების მართვის სისტემის ISO/IEC 27001: 2013 სტანდარტთან შესაბამისობაზე დასერტიფიცირდა.

კიბერუსაფრთხოებისა და IT ინოვაციების კონფერენცია საქართველოს იუსტიციის სამინისტროს მონაცემთა გაცვლის სააგენტოსა და ICT ბიზნეს საბჭოს ორგანიზებით ყოველწლიურად ტარდება და მისი მიზანია საინფორმაციო ტექნოლოგიების გამოყენებით რეგიონის სოციალურ-ეკონომიკური განვითარების ხელშეწყობა.

წლევანდელ კონფერენციაში, რომელშიც 20 ქვეყნის 400-მდე წარმომადგენელი მონაწილეობდა განსაკუთრებული ყურადღება დაეთმო როგორც საქართველოში, ისე რეგიონში ელექტრონული მმართველობის განვითარების საკითხებს, კიბერ და ინფორმაციული უსაფრთხოების პროექტებს, ასევე ამ პროექტებში ტექნოლოგიური ინოვაციების დანერგვის პროცესს. წელს, 15 ნომინაციაში საჯარო და კერძო სექტორიდან 50-მდე IT პროექტი იყო წარდგენილი.

ინფორმაციისთვის, 2012 წლიდან საქართველოს ეროვნულმა ბანკმა შემდეგ ნომინაციებში მოიპოვა გამარჯვება: „ყველაზე წარმატებული ინფრასტრუქტურული გადაწყვეტილება" (2012; 2014), „საუკეთესო IT მენეჯმენტი" (2012; 2014), „ყველაზე ფართოდ გამოყენებადი ელექტრონული სერვისი", „ინფორმაციული უსაფრთხოების საუკეთესო მენეჯმენტი".