საქართველოს ეროვნული ბანკის სამახსოვრო მონეტების თემატიკის განსაზღვრისა და დიზაინის შერჩევის კომისიის გადაწყვეტილებით,  დამზადდება ახალი სამახსოვრო მონეტა, რომელიც ბაქო–თბილისი–ყარსის სარკინიგზო გადასასვლელის ამოქმედებას მიეძღვნება.   ახალ სამახსოვრო მონეტის დამზადების დეტალების შესათანხმებლად აგვისტოს მეორე ნახევარში თურქეთში სამმხრივი (ქართულ–აზერბაიჯანულ–თურქეული) შეხვედრის გამართვაა დაგეგმილი, რომლის მუშაობაშიც საქართველოს ეროვნული ბანკის წარმომადგენლებიც მიიღებენ მონაწილეობას. აღნიშნულ შეხვედრაზე დადგინდება სამახსოვრო მონეტის მახასიათებლები.   ბაქო–თბილისი–ყარსის სარკინიგზო მაგისტრალის ამოქმედებისადმი მიძღვნილი ახალი სამახსოვრო მონეტა საქართველოში, აზერბაიჯანსა და თურქეთში ერთობლივად შევა მიმოქცევაში აღნიშნული სატრანსპორტო პროექტის ექსპლუატაციაში შესვლის შემდეგ. ქართული, აზერბაიჯანული და თურქული მონეტების რევერსის დიზაინი იდენტური იქნება, ავერსზე კი გამოისახება სამი ქვეყნის ეროვნული ფულის ნიშანი – მანათი, ლარი და ლირა.