საქართველოს ეროვნული ბანკის პრეზიდენტი რომან გოცირიძე 11 ივნისს აზერბაიჯანის დედაქალაქ ბაქოში მონაწილეობას მიიღებს „შავი ზღვის ვაჭრობისა და განვითარების ბანკის“ (BSTDB) მმართველთა საბჭოს რიგით მერვე წლიური სხდომის მუშაობაში. მმართველთა საბჭოს შეხვედრის ფარგლებში დაგეგმილია BSTDB-ის მიერ 2005 წელს გაწეული საქმიანობის ანგარიშის განხილვა და ბანკის ბიუჯეტის დამტკიცება 2006 წლისათვის.   12 ივნისს რომან გოცირიძე მიწვეულია შავი ზღვის რეგიონის ქვეყნების „ბიზნესდღეზე“, რომელსაც აზერბაიჯანის პრეზიდენტი ილჰამ ალიევი გახსნის. ფორუმს დაესწრებიან „შავი ზღვის ვაჭრობისა და განვითარების ბანკისა“ და შავი ზღვის აუზის ქვეყნების ცენტრალური ბანკების ხელმძღვანელები, ბიზნესწრეების წარმომადგენლები. დღის წესრიგით დაგეგმილია დებატები საფინანსო სექტორის როლსა და მნიშვნელობაზე ეკონომიკის განვითარების პროცესში. ფორუმის მონაწილეები ასევე იმსჯელებენ  რეგიონის საინვესტიციო შესაძლებლობებზე.   „შავი ზღვის ვაჭრობისა და განვითარების ბანკის“ (BSTDB) სტრუქტურაში ყველაზე მსხვილი აქციონერები არიან თურქეთი, რუსეთი და საბერძნეთი. თითოეული ფლობს აქციების 16.5%-ს, ბულგარეთი, რუმინეთი და უკრაინა ცალ-ცალკე – 13.5-13.5%-ს, ალბანეთი და აზერბაიჯანი – 2-2%-ს, საქართველო, სომხეთი და მოლდოვა კი თითოეული 1%-ის ოდენობის აქციებს განკარგავს. 2004 წელს საქართველოს წილი აღნიშნული ბანკის სააქციო კაპიტალში, დავალიანების გამო, 2%-დან 1%-მდე შემცირდა. „შავი ზღვის ვაჭრობისა და განვითარების ბანკი“ „ბისეკის“ წევრი (შავი ზღვის ეკონომიკური თანამშრომლობის ორგანიზაცია) წევრი სახელმწიფოებისთვის ფინანსური სიძნელეების შემსუბუქების მიზნით ჩამოყალიბდა. მისი შტაბბინა საბერძნეთის ქალაქ სალონიკში მდებარეობს. ხელშეკრულებას ბანკის დაფუძნების შესახებ თბილისში, „ბისეკის“ ქვეყნების საგარეო საქმეთა მინისტრების შეხვედრაზე მოეწერა ხელი 1994 წლის 30 ივნისს, ხოლო საქართველოს პარლამენტმა მისი რატიფიცირება მოახდინა 1996 წლის 25 დეკემბერს. „შავი ზღვის ვაჭრობისა და განვითარების ბანკმა“ ჩამოყალიბების საორგანიზაციო და სამართლებრივი სტადიების გავლის შემდეგ, 1999 წლის პირველი ივნისიდან ფინანსური ოპერაციების წარმოება დაიწყო. აღნიშნულმა ბანკმა სს „საქართველოს ბანკს“, სს „თიბისი ბანკს“, სს „გაერთიანებულ ქართულ ბანკს“, სს „პროკრედიტბანკს“, სსკბ „რესპუბლიკას“ 32 მლნ აშშ დოლარის საკრედიტო ხაზები გაუხსნა. ამასთან, დააფინანსა ფოთის ნავთობტერმინალის რეკონსტრუქციის პროექტი, 8 მლნ აშშ დოლარის მოცულობით.