მხოლოდ საქართველოს ეროვნულ ბანკს აქვს როგორც მიმოქცევისათვის, ისე საკოლექციო ან/და სხვა საჭიროებისათვის განკუთვნილი ლარის ბანკნოტებისა და მონეტების დამზადებისა და საქართველოს ტერიტორიაზე მათი გამოშვების უფლება ("საქართველოს ეროვნული ბანკის შესახებ" საქართველოს ორგანული კანონი, მუხლი 35).
ეროვნული ბანკის მიერ გამოშვებული საკოლექციო პროდუქციის შეძენა შესაძლებელია სების საკასო ოპერაციებისა და ნაღდი ფულის მიმოქცევის დეპარტამენტის საკასო ცენტრის სალაროში (კახეთის გზატკეცილი N72, თბილისი) ნაღდი ან უნაღდო ანგარიშსწორებით (საბანკო პლასტიკური ბარათით, საბანკო გადარიცხვით) და აგრეთვე, ინტერნეტ მაღაზიის მეშვეობით.
საქართველოს ეროვნული ბანკის მიერ გამოშვებული სარეალიზაციო პროდუქციის ფასი მოიცავს:
- საკოლექციო ფულის ნიშნებისთვის - ნომინალურ ღირებულებას, მათ დამზადება-მოწოდებაზე გაწეულ ხარჯებსა და საკომისიო დანამატს.
- საინვესტიციო მონეტებისთვის - მონეტის შემადგენლობაში არსებული ოქროს საბაზრო ღირებულებასა ("ლონდონის ძვირფასი ლითონების ბაზრის ასოციაციის" ვებგვერდზე წინა დღის მეორე ნახევარში - ლონდონის დროით 15:00 საათზე 1 უნცია ოქროზე აშშ დოლარით დაფიქსირებული ფასისა და სების მიერ ლარის მიმართ აშშ დოლარის გაცვლის ოფიციალურად მოქმედი კურსის მიხედვით) და საკომისიო დანამატს.
- ოქროს ზოდებისთვის - მათ დამზადება-მოწოდებაზე გაწეულ ხარჯებსა და საკომისიო დანამატს.
საქართველოს ეროვნული ბანკის მიერ საკოლექციო პროდუქციის რეალიზაცია ხორციელდება საქართველოს ეროვნული ბანკის საბჭოს მიერ დამტკიცებული "ლარის ბანკნოტების/მონეტების, ოქროს ზოდებისა და ნუმიზმატიკური ფასეულობის რეალიზაციის წესით" განსაზღვრული პირობების მიხედვით.
საქართველოს ეროვნული ბანკის ვებგვერდი იყენებს Cookie ფაილებს თქვენი გამოცდილების გაუმჯობესების, და უკეთესი ნავიგაციის მიზნით.
თუ აგრძელებთ ჩვენი საიტის გამოყენებას, ამით თანხმობას აცხადებთ Cookie ფაილების გამოყენებაზე.