სიტყვა "ლარი", რომელიც შეირჩა ქართული ეროვნული ვალუტის ძირითადი ერთეულის სახელწოდებად, ძველი ქართული სიტყვაა და ნიშნავს ზოგადად განძს, ქონებას, ხოლო, "თეთრი", რომელიც ლარის მეასედ ნაწილს ეწოდა, ასევე ძველი, XIII საუკუნიდან დამკვიდრებული ქართული სამონეტო ტერმინია.

საქართველოს ეროვნული ვალუტა "ლარი" შემოღებულ იქნა 1995 წლის 25 სექტემბრიდან, ხოლო ამავე წლის 2 ოქტომბრიდან გამოცხადდა ერთადერთ კანონიერ საგადამხდელო საშუალებად ქვეყნის მთელ ტერიტორიაზე. თავდაპირველად მიმოქცევაში შემოღებულ იქნა - 1, 2, 5, 10, 20, 50 და 100 ლარის ნომინალის ბანკნოტები და 1, 2, 5, 10, 20, და 50 თეთრის ნომინალის მონეტები, 2006 წლიდან - 1 და 2 ლარის ნომინალის მონეტები, ხოლო 2007 წლიდან - 200 ლარის ნომინალის ბანკნოტები.

ლარი არის გადახდის ერთადერთი კანონიერი საშუალება საქართველოს ტერიტორიაზე, გარდა თავისუფალი ინდუსტრიული ზონებისა, თავისუფალი ვაჭრობის პუნქტებისა ან/და ეროვნული ბანკის მიერ განსაზღვრული შემთხვევებისა.

საქართველოს კონსტიტუციისა და "საქართველოს ეროვნული ბანკის შესახებ" საქართველოს ორგანული კანონის თანახმად, ლარის ბანკნოტებისა და მონეტების დამზადებისა და საქართველოს ტერიტორიაზე მათი გამოშვების უფლება აქვს მხოლოდ საქართველოს ეროვნულ ბანკს.

ლარის ბანკნოტებისა და მონეტების გაფორმებას, დიზაინს, ნომინალს, ზომას, წონას, რაოდენობას, მასალასა და სხვა მახასიათებლებს განსაზღვრავს ეროვნული ბანკის საბჭო.

ეროვნული ბანკის მიერ მიმოქცევაში გაშვებული ან რეალიზებული ლარის ბანკნოტები და მონეტები არის ეროვნული ბანკის უპირობო ვალდებულება ნომინალური ღირებულებით, გარდა იმ ბანკნოტებისა და მონეტებისა, რომლებიც ამოღებულია მიმოქცევიდან ან/და განეკუთვნება ნუმიზმატიკურ ფასეულობას.

ეროვნული ბანკი სისტემატურად ახორციელებს მოძველებული ლარის ბანკნოტებისა და მონეტების მიმოქცევიდან ამოღებას და მათ ჩანაცვლებას შესაბამისი ოდენობის ახალი ბანკნოტებითა და მონეტებით. მიმოქცევიდან ამოღებული ლარის ბანკნოტების და მონეტების განადგურებას უზრუნველყოფს მხოლოდ საქართველოს ეროვნული ბანკი.

დღეისათვის საქართველოს ეროვნული ბანკი უშვებს მიმოქცევის დანიშნულების 5, 10, 20, 50, 100 და 200 ლარის ნომინალის ბანკნოტებს და 5, 10, 20, 50 თეთრის, 1 და 2 ლარის ნომინალის მონეტებს.