საქართველოს ეროვნულ ბანკში დასრულდა განაცხადების მიღება ატესტაციის შედეგად გამოთავისუფლებული ორი ვაკანტური ადგილის დასაკავებლად. განაცხადი 230-მა პრეტენდენტმა შემოიტანა. წერითი ტესტირების წარმატებულად გავლის შემდეგ, ისინი საკონკურსო-საატესტაციო კომისიის წინაშე გასაუბრებას გაივლიან.   პარალელურად, საქართველოს ეროვნულ ბანკში გრძელდება თანამშრომელთა ატესტაციის პროცესი. საქართველოს ეროვნული ბანკის საკონკურსო-საატესტაციო კომისიის მიერ შედეგების შეჯამების შემდეგ დეპარტამენტებში საკადრო ცვლილებები ხორციელდება: ხდება იმ მოხელეთა დაწინაურება, ვინც წარმატებით დაძლია ატესტაციის ორივე ეტაპი და პირიქით, შეიძლება მოხდეს იმ მოხელეების თანამდებობრივი დაქვეითება ან სარგოს გადახედვა, რომელთაც ვერ შეძლეს საკონკურსო პირობების დაკმაყოფილება.   საკონკურსო-საატესტაციო კომისიის გადაწყვეტილებით, არჩევანი ტესტირების წერილობით ფორმაზე გაკეთდა. ტესტები მოიცავს საქართველოს საბანკო კანონმდებლობის, მაკრო და მიკროეკონომიკის, ზოგადი უნარებისა და კომპიუტერული პროგრამა Microsoft Excel-ის საკითხებს.   საქართველოს ეროვნულ ბანკში უკვე გაიარეს ატესტაცია მაკროეკონომიკისა და სტატისტიკის, სავალუტო და ფულად-საკრედიტო ოპერაციებისა და ზედამხედველობის დეპარტამენტების თანამშრომლებმა.   საქართველოს ეროვნულ ბანკში მიმდინარე თანამშრომელთა ტესტირება-ატესტაცია საკადრო რეფორმის ნაწილია. ატესტაციამდე საქართველოს ეროვნულ ბანკში სტრუქტურული რეორგანიზაცია განხორციელდა.