საქართველოს ეროვნულ ბანკში გრძელდება თანამშრომელთა ატესტაცია. დღეს ატესტაციაზე ზედამხედველობის დეპარტამენტის თანამშრომლები გავიდნენ. მოგვიანებით მას საქართველოს ეროვნული ბანკის სხვა დეპარტამენტების თანამშრომლებიც გაივლიან.   საკონკურსო-საატესტაციო კომისიის გადაწყვეტილებით, ტესტების ჩაბარება წერილობითი ფორმით ხდება. მასში შესულია საქართველოს საბანკო კანონმდებლობის, მაკრო და მიკროეკონომიკის, ზოგადი უნარებისა და კომპიუტერული პროგრამა Microsoft Excel-ის შესახებ საკითხები.   ტესტირების გავლის შემდეგ გათვალისწინებულია მეორე ეტაპი – გასაუბრება. ეროვნული ბანკის მოსამსახურეები წარსდგებიან საკონკურსო-საატესტაციო კომისიის წინაშე. მოსამსახურეს, რომელიც წერილობით გამოცდას წარმატებით ჩააბარებს, გასაუბრებაზე გასვლის უფლება ექნება.   თანამშრომელთა ტესტირება-ატესტაცია საქართველოს ეროვნულ ბანკში მიმდინარე საკადრო რეფორმის ნაწილია. ატესტაციამდე ეროვნულ ბანკში სტრუქტურული რეორგანიზაცია განხორციელდა. მანამდე არსებული 19 სტრუქტურული ერთეულის, 53 განყოფილებისა და 9 რეგიონული ფილიალის  ნაცვლად, მხოლოდ 15 სტრუქტურული ერთეული და 7 რეგიონული ფილიალი ჩამოყალიბდა.