200 ლარის ნომინალის ბანკნოტის დიზაინის საუკეთესო ესკიზის გამოსავლენად საქართველოს ეროვნულმა ბანკმა გამოაცხადა კონკურსი, რომელშიც მონაწილეობის მიღება როგორც ქართველ, ასევე უცხოელ მხატვარ-დიზაინერებს შეუძლიათ. კონკურსში მონაწილეობის მსურველებმა ნამუშევრები საქართველოს ეროვნულ ბანკში 20 სექტემბრამდე უნდა წარადგინონ. 200 ლარის ნომინალის ბანკნოტის ავერსზე გამოსახული უნდა იყოს საზოგადო მოღვაწის ნიკო ნიკოლაძის პორტრეტი, რევერსზე კი – სოხუმის ხედი.   საქართველოს ეროვნული ბანკის ფულის ნიშნების დამზადებასთან დაკავშირებული საქმიანობის მართვის კომისიის გადაწყვეტილებით, კონკურსში წარმოდგენილი ესკიზებიდან სამი შეირჩევა, რომელთა ავტორებიც ფულადი პრემიით დაჯილდოვდებიან.   მხატვარ-დიზაინერები ნიკო ნიკოლაძის პორტრეტისა და აფხაზეთის (სოხუმის) ხედის შერჩევისას სრული თავისუფლებით ისარგებლებენ. თუმცა საქართველოს ეროვნული ბანკიც ოფიციალური ინტერნეტ-წარმომადგენლობის მეშვეობით გამოაქვეყნებს ნიკო ნიკოლაძის პორტრეტებსა და სოხუმის ხედების ამსახველ ფოტომასალას, რომლის გამოყენებაც შეეძლებათ კონკურში მონაწილე ქართველ და უცხოელ მხატვარ-დიზაინერებს.